WASIMAMIZI WA VITUO VYA KUPIGIA KURA MVOMERO WATAKIWA KUTANGULIZA UZALENDO ZAIDI KULIKO MASLAHI

Posted on: November 23rd, 2024

Wasimamizi Wakuu na Wasimamizi wasaidizi wa vituo vya kupigia kura wa Serikali za Mitaa 2024  wametakiwa kutanguliza uzalendo na maadili katika utekelezaji wa majukumu yao wakati wa uchaguzi huo ambao unatarajiwa kufanyika siku ya Jumatano Novemba 27, 2024.

Wito huo umetolewa na Msimamizi Msaidizi wa Uchaguzi ngazi ya Wilaya Bi. Mary Kayowa wakati akifungua Semina ya siku moja kwa Wasimamizi Wakuu na Wasimamizi wasaidizi wa Vituo vya kupigia kura kwa uchaguzi wa Serikali za Mitaa.

Akizungumza na wasimamizi hao, Msimamizi huyo  amesema kuwa jukumu walilopewa ni nyeti na linahitaji uadilifu wa hali ya juu ili kulinda haki za wapiga kura na kuimarisha demokrasia katika taifa.

"...lakini tunapaswa kufahamu kuwa jambo hili ni nyeti na maslahi yake hayafanani na jambo ambalo tunaenda kulifanya, ni jambo linaloonesha uzalendo wetu sisi..." amesema Mary Kayowa.

Aidha, Bi. Mary ameonya dhidi ya matumizi ya lugha zisizofaa kwa wananchi ambao watajitokeza kupiga kura na kwamba hatarajii kuona wasimamizi hao wanakiuka sheria, kanuni na miongozo iliyowekwa.

Mafunzo hayo yamelenga kuwajengea uwezo wa kiutendaji, hasa katika masuala ya utaratibu wa kupiga kura, kuhesabu kura, na kutangaza matokeo kwa uwazi.

MWISHO.