AHADI YA RAIS SAMIA KUHUSU BIMA YA AFYA KWA WOTE YAANZA KUTEKELEZWA, WASIMAMIZI VITUO VYA AFYA WAJENGEWA UWEZO KUFANIKISHA

Posted on: December 18th, 2025

Ahadi ya Rais wa Jamhuri ya Muungano wa Tanzania, Mhe. Dkt. Samia Suluhu Hassan aliyoitoa wakati wa kampeni za uchaguzi Mkuu 2025 kuhusu utekelezaji wa mpango wa Bima ya Afya kwa wote ndani ya siku 100 za mwanzo imeanza kuchukua sura mpya wilayani Mvomero, baada ya wasimamizi wa vituo vya kutolea huduma za afya, kujengewa uwezo ili kuhakikisha mpango huo unafanikiwa kwa ufanisi.

Mafunzo hayo maalumu yamefanyika Disemba 18, 2025 katika ukumbi wa mikutano wa Halmashauri ya Wilaya ya Mvomero ambayo yamewakutanisha wasimamizi wa vituo vya afya, watoa huduma, Wajumbe wa timu ya Menejimenti ya Halmashauri (CMT) na Wajumbe wa Timu ya Usimamizi na uendeshaji wa Huduma za Afya (CHMT) Pamoja na wadau wa sekta ya afya wilayani humo.

Washiriki wa mafunzo hayo wamepatiwa elimu kuhusu namna bora ya kusimamia mfumo wa bima, utoaji wa huduma kwa wateja, usimamizi wa taarifa za afya, pamoja na mbinu za kupunguza changamoto zinazoathiri utekelezaji wa mpango huo.

Akizungumza wakati wa ufunguzi wa mafunzo hayo, Mganga Mkuu wa Wilaya ya Mvomero Dkt. Phillipina Phillipo amesema kuwa utekelezaji wa Bima ya Afya kwa Wote ni hatua muhimu katika kuboresha upatikanaji wa huduma za afya kwa wananchi wote bila ubaguzi, na kuongeza kuwa uelewa wa wasimamizi utaongeza ufanisi katika kutoa huduma stahiki.

Kwa upande wake Meneja wa Mamlaka ya Usimamizi wa Bima (TIRA) Kanda Mashariki Bw. Zakaria Muyengi amesema kuwa mafunzo hayo ni sehemu ya utoaji wa elimu na hamasa kuhusu mpango na sheria ya Bima ya Afya kwa wote. Ameongeza kuwa lengo kuu la TIRA ni kuhakikisha kuwa watoa huduma za afya wanajisajili kwenye mfumo wa utambuzi wa ors.tira.go.tz.

Aidha, amebainisha kuwa mwitikio wa kujisajili na mfumo huo ni mzuri ambapo kati ya watoa huduma 91 wa Wilaya hiyo watoa huduma 70 wameshajiandikisha huku 21 pekee bado hawajajisajili, pia ametoa wito kwa wananchi kujiunga na bima.

Naye Dkt. Sami Haruna kutoka Mfuko wa Taifa wa Bima ya Afya (NHIF) ameeleza matarajio yao ni kupata wanachama wengi huku akitoa rai kwa vituo vya kutolea huduma za afya kujiandaa vizuri