Utekelezaji Mfumo wa Anwani za Makazi

Posted on: March 5th, 2022

Timu ya Kamati ya Anwani za Makazi Wilaya ya Mvomero imefanya uwezeshaji katika ngazi ya Kata, Vijiji na Vitongozi kuelimisha wajumbe mbalimbali juu ya utekelezaji wa Mfumo wa Anwani za Makazi katika Tarafa nne za Halmashauri ya Wilaya hiyo.

Mfumo wa Anwani za Makazi ambao ni utambulisho wa mahali kitu/mtu anapopatikana juu ya uso wa nchi, unalenga kurahisha upatikanaji na upelekaji wa huduma za kijamii na kuiwezesha Serikali kuwafikia wananchi popote walipo nchini. Mfumo huo unaoratibiwa na Wizara ya Habari, Mawasiliano na Teknolojia ya Habari unatarajiwa kukamilika ifikapo Mei 22 nchini kote ikiwa ni maagizo ya Mhe. Rais Samia Suluhu Hassan.

Katika Halmashauri ya Wilaya ya Mvomero, Timu ya Uratibu Wilaya imejigawa katika Tarafa 4 za Mlali,Mgeta, Mvomero na Turiani ,shughuli inayoendelea ni kufanya vikao na viongozi wa  Baraza la Maendeleo la Kata,Watendaji wa Vijiji,Wenyeviti wa vijiji na Wenyeviti wa Vitongoji ikiwa ni hatua ya kufanya uhamasishaji kwa jamii wajue zoezi lililoko mbele yetu.Ikiwa ni agizo la Mhe.Rais la kuhakikisha wananchi wanashirikishwa katika zoezi hili kwani utawafanya kuwa mabalozi wazuri na imara na walinzi kulinda mitaa yao, na miundombinu  ambayo inatarajiwa kuwekwa.

Tayari nafasi 687 zimetangazwa kwa vijana watakaojengewa uwezo na kusaidia kuingiza taarifa kwenye programu tumizi ya NaPA ambayo itahifahi taarifa hizo ili baadae iwe rahisi kufanya ufuatiliaji wa barabara, mitaa na nyumba  ambazo vibao na nguzo zitabandikwa katika ukamilishaji wa zoezi hili.